Paalam Mang Joe...

Naaalala ko pa nang madalas akong buhat-buhatin ni Mang Joe (Joemari Mongcal) sa loob ng mga haligi ng Artist's room sa GASI noon. Hindi ko rin makalimutan ang paghatak niya sa akin noong maliit pa ako sa isang picture taking kasama ang grupo ng mga batikang nobelista, illustrator at letterer sa isang outing sa Montalban. Hanggang ngayon ay nakalarawan pa rin sa aking isip ang saya ng araw na iyon. Isa siya sa mga malapit na kaibigan ng father ko noon sa Komiks. Kung mayroon mang bukambibig ang Mother ko sa mga kaibigan ng pamilya ay isa si Mang Joe doon. 

Subalit ngayong araw na ito, sa aking pagbukas ng Message Board ng mga Komikero ay tumambad sa akin ang isang napakasamang balita mula kay Mang Dell Barras.

Pumanaw sa isang vehicular accident si Mang Joe sa may Baclaran. Dali-dali akong tumawag sa Father ko sa Pilipinas upang ibalita sa kanya ito. Lungkot at gulat ang naramdaman ko sa kanya. Marahil sa kadahilanang apat na araw rin mula ngayon ay dadalaw naman ang aming pamilya sa labi ng mother ko para sa ikalimang taong death anniversary niya. 

Muli kong nakita si Mang Joe after more than thirty years sa 2nd Komikon na ginanap sa UP Bahay ng Alumni. Hindi ko akalain na dito uli kami magtatagpo sa paaralang humubog sa pagiging ganap na artist ko. Subalit habang pinagmamasdan ko sila ng tatay kong nag-uusap ay hindi mawalay sa aking isip na ang dalawang taong ito talaga ang mga unang naghulma sa akin at nagbigay ng unang edukasyon sa larangan ng pagdidibuho. Sinubukan muli akong buhatin ni Mang Joe gaya ng ginagawa niya sa akin noong maliit pa ako, pero ang yakap at akbay lang niya ay sapat na sa amin upang ibalik ang alaala ng nakaraan.

Paalam Mang Joe... at kung sakaling magkita kayo ng Mother ko, pakikumusta ako sa kanya.

Kuha namin nina Mang Joe (nasa gitna) kasama ang tatay ko (nasa kaliwa) sa 2nd Komikon sa UP Bahay ng Alumni.